人必先自侮而後人侮之！意甲球會成日講到鬼咁慘，話舊年「電話門」事件點冤枉，AC米蘭贏歐聯點樣省招牌等等，但力奇睇完佢煞科日鬧劇，只係會講就算佢比賽點樣「安排」到峰迴路轉，都好難追得上英超，成為全球球迷至愛，皆因佢缺乏足球比賽最需要真誠。 唔少人都話意甲充斥假波，結果舊年一單「電話門」事件，就踢爆唔少大球會都參與操控球賽戰果。以為經過大整頓會有所收斂咩？今季最後幾輪賽事，諸如帕爾馬節節勝利大翻身，里賈納、錫耶納煞科日砌低勁旅AC米蘭同拉素逃出生天等，都令力奇再次對意甲比賽真實性帶相當懷疑。 AC拉素冇開盤唔多妥
當然，力奇唔敢一口咬定話意甲賽事有內定戰果，但至少就連足智彩同唔少歐洲莊家，都唔敢立亂對意甲賽事開盤，就知內有唔少蠱惑令人擔心。或者大家會話AC同拉素已經冇乜好爭，收起部分主力實屬正常，但唔該佢至少都畀番鬥志，對自己同對球迷有個交代，球員有冇落力比賽大家有眼睇，賽後力奇唔少朋友都話場波唔多妥囉！ 相比起，英超素來引人入性之處，正係佢各支球隊不論級數，落到場梗會交足貨，球員個個都有打甩門牙帶血吞呢份氣勢。英超煞科日錫菲聯對韋根之戰的確大戰氣氛十足，就算係韋斯咸作客捧盃曼聯，「紅魔鬼」末段都會推番C朗、傑斯同史高斯出攻畀你睇。英超定意甲？I LOVE 英超！ | 
