Bee基半年前染個灰色頭，慢慢甩咁色變成金頭人，配合本身個惡樣、一條金鏈同一個男裝手袋（同事稱之為撈家袋），曾經產生過好多意想不到化學作用。好似平時Bee基搭巴士返工，無論上層幾爆都好，都好少有人會坐埋Bee基隔籬，佢寧願返番落下層企。至於會坐埋唔係個Look仲辣，就係公公婆婆，靚女？想就可以！ 金髮染黑 化學作用消失
仲有一次同朋友去飲，一坐低，隔籬一位貓哥仔，唔該冇聲就撻落Bee基大髀度，咁情況，Bee基好自然望位哥仔同朋友。大鑊！幾位朋友造型似曾相識，哦！咪電影《古×仔》入邊「×南」同「×雞」囉！Bee基本來想講「係我唔」，點知幾位大哥搶先向我講對唔住，跟手仲同我祝酒，先一句「有怪莫怪」、再一句「身體健康」，嚇到Bee基鼻哥窿都冇肉……使唔使咁呀？ 近日Bee基發覺甩好多頭髮，聽朋友勸將金髮染黑晒，但係之前化學作用隨之消失，連日聽到唔係「你受咩刺激？」、「你戴假髮？」，就係「個飛髮佬整蠱你！」自信心跌至新低，唔通真係要刮光佢！ 上星期推介維爾港幫唔幫到大家？今晚Bee基幾經辛苦搵到場史篤城對黑池，主隊積分榜排頭，客軍就排十五，歐平主勝1.7倍、和3.4倍、客勝4.58倍反映晒歐莊點睇，不過足智彩開幾乎全球最高主勝1.85倍，反而開和3.2倍同客勝3.7倍，似係對「一哥」有保留，但照開「讓球主客和」，睇開Bee基推介朋友，應該會玩多少「客勝」啦！
| 
